Товарларни келиб чиқиш мамлакатини аниқлаш
бўйича Жамиятнинг ягона автоматлаштирилган
ахборот тизимини яратиш тўғрисида

Ўзбекистон Республикаси Президентининг 2019 йил 20 ноябрдаги ПҚ-4525-сонли Қарори ижросини таъминлаш мақсадида, Бош вазир ўринбосари Д. Кучкаровнинг 2020 йил 12 июндаги 02/1-525-сонли топшириғи, ҳамда икки томонлама ҳамкорлик даражасини яхшилаш бўйича Ўзбекистон-Россия ишчи гуруҳининг 2020 йил 13 мартдаги 4 учрашув баённомасига асосан, товарларни келиб чиқиш мамлакатини аниқлаш бўйича ягона автоматлаштирилган ахборот тизимини яратиш кўзда тутилган. Шунингдек, Инвестициялар ва ташқи савдо вазирлигининг топшириғига асосан (2020 йил 8 ноябрдаги ДСП-05-12-1-сонли), мазкур тизимни Беларусия Республикаси билан ҳам йўлга қўйиш белгиланган.

Ушбу тизим Жамият ва унинг ҳудудий бўлинмалари томонидан товарларни келиб чиқиш мамлакатини аниқлаш бўйича кўрсатиладиган хизматларни автоматлаштириш, молиявий бухгалтерия ҳисоби ва бошқа вазифаларни ўз ичига олиб, алоқадор вазирлик ва идораларнинг ахборот тизимлари, шу жумладан, Божхона ахборот тизими (“Ягона-дарча” БАТ) билан интеграция қилиш имкониятига эга бўлган ягона тизим ҳисобланади.

Мазкур лойиҳанинг 1-босқичи 2019 йилнинг декабрь ойида бошланган бўлиб, унга кўра автоматлаштирилган тизимни ишлаб чиқиш ва ривожлантириш бўйича қонунчиликда ўрнатилган тартибда шартнома имзоланди, ушбу тизимни ишга тушириш ва узлуксиз ишлаши учун жами 712 млн.сўмлик ахборот информацион дастурий таъминот тизими,сервер ва бошқа ёрдамчи ускуналар харид қилинди, ва ҳозирда тизимнинг синов ишлари олиб борилмоқда.

2-босқичда мазкур тизимни жамиятнинг ҳудудий бўлинмаларига ҳам жорий қилиш кўзда тутилган ва бу тадбирларга 500 млн.сўм миқдорда маблағ йўналтирилиши режалаштирилмоқда.

Шу билан бирга, Ўзбекистон Республикаси Президентининг “Давлат иштирокидаги корхоналарни ислоҳ қилишни жадаллаштириш ҳамда давлат активларини хусусийлаштиришга оид чора-тадбирлар тўғрисида”ги 2020 йил 27 октябрдаги ПФ-6096-сон Фармони 3-иловасига кўра, “Ўзбекэкспертиза” АЖ хусусийлаштиришдан олдин тайёрлаш ва инвестициявий жозибадорлигини ошириш орқали оммавий савдоларда тўлиқлигича давлат акция пакетлари сотиладиган корхоналар рўйхатига киритилган.

Жамиятнинг иқтисодий барқарорлигини, инвестицион жозибадорлигини ва рақобатбардошлигини сақлаб қолиш мақсадида, керакли барча чора-тадбирлар амалга оширилмоқда.