Mahalliy mahsulotlarni xorijiy davlatlarga eksport qilishda ko'maklashish

O‘zbekiston Savdo-sanoat palatasi Raisi Davron Vaxabov hamda «O'zbekekspertiza» AJ Bosh direktori Artem Grigoryans boshchiligida videokonferensiya shaklidagi yig‘ilish bo‘lib o‘tdi.

Unda O‘zbekiston Respublikasi Prezidentining 2024-yil 14 martdagi “Tashqi savdo va hududiy sanoatni rivojlantirishda tadbirkorlik uyushmalarining rolini yanada oshirish chora-tadbirlari to‘g‘risida"gi PQ-126-sonli qarori bilan belgilangan vazifalarni amalga oshirish chora-tadbirlari muhokama qilindi.

Endilikda Savdo-sanoat palatasi va “O'zbekekspertiza” aksiyadorlik jamiyatining boshqaruvi bilan aloqalari kuchaytirilishi natijasida yangi tizim ishga tushiriladi.

Mazkur tizim bilan mahalliy ishlab chiqaruvchi korxonalar tomonidan ishlab chiqarilgan mahsulotlarni xorijiy davlatlarga chiqarishda ko'maklashish, tadbirkorlik subyektlariga xorijiy davlatlarda mahsulotlarga qo‘yilgan talablar bo‘yicha ma’lumotlar yetkazish, labaratoriya xulosasi va sertifikat rasmiylashtirishda yordam berish nazarda tutilgan.

Yig'ilishda eksport qiluvchi korxonalarga milliy mahsulotlar va brendlarni tashqi bozorlarga chiqarish hamda xalqaro standartlashtirish va xalqaro sertifikatlarni olishda qo‘llab-quvvatlash bo‘yicha tizimli ishlarni tashkil etishi zarurligi ta’kidlandi. Shuningdek, Tadbirkorlarni qo‘llab-quvvatlash loyiha ofislari tashkil etish boʻyicha koʻrsatmalar berildi.

Ularning asosiy maqsadi tadbirkorlik subyektlari uchun biznes-reja ishlab chiqish va ularga tayyor biznes loyihalarini taklif etish, biznesni yuritish va korporativ boshqaruvni yo‘lga qo‘yishda amaliy yordam berish hisoblanadi.