“Ўзбекэкспертиза” АЖ Бош директорининг коррупцияга қарши курашиш фаолиятини самарали ташкил этиш юзасидан Жамият ходимларига МУРОЖААТИ

Ҳозирги глобаллашув, минтақа ва давлатлараро интеграция жараёнлари жадаллашиб бораётган мураккаб бир шароитда коррупция чегара билмас муаммога айланди. Айтиш лозимки, коррупция келтириб чиқараётган оқибатлар жамиятларни ич-ичидан емириб, демократик ва ҳуқуқ устуворлиги асосларига путур етказади, инсон ҳуқуқларининг қўпол равишда бузилишига олиб келади, иқтисодий ривожланишни издан чиқаради, жамият ва давлат учун ўта хавфли бўлган уюшган жиноятчилик ва терроризмнинг кенг ёйилишига шароит яратиб беради. Мамлакатимизда коррупцияга қарши курашиш соҳасида қонун ҳужжатларини янада такомиллаштириш, фуқароларнинг ҳуқуқий маданиятини юксалтириш, жамиятда коррупцияга нисбатан муросасиз муносабатни шакллантириш борасида кенг кўламли ишлар амалга оширилмоқда. Таълим, соғлиқни сақлаш, ижтимоий таъминот, давлат ва жамият ҳаётининг бошқа соҳаларида ушбу жиноятга оид ҳуқуқбузарликларни ўз вақтида аниқлаш, чек қўйиш, бунга имкон берувчи сабаб ва омилларни бартараф этиш масалалари доимий эътиборда. Хусусан, “Коррупцияга қарши курашиш тўғрисида”ги қонуннинг қабул қилиниши, шунингдек, Коррупцияга қарши курашиш бўйича республика идоралараро комиссиясининг ташкил этилиши ва коррупцияга қарши курашиш бўйича Давлат дастурининг тасдиқланиши юртимизда коррупция билан боғлиқ ҳуқуқбузарликларнинг олдини олишга қаратилган қатор чора-тадбирларни самарали амалга оширилишини таъминлаётир. Қисқа вақт ичида коррупцияга қарши курашишнинг ҳуқуқий механизмларини такомиллаштиришга оид бир нечта Ўзбекистон Республикаси Президентининг тегишли фармон ва қарорлари қабул қилинди. Шу жумладан, 03.02.2021 йилдаги ПФ-6155-сон, 06.07.2021 йилдаги ПФ-6257-сон, 06.07.2021 йилдаги ПҚ-5177-сон, 22.10.2021 йилдаги ПҚ-5263-сон, 07.12.2021 йилдаги ПҚ-34-сон, 12.01.2022 йилдаги ПҚ-81-сон ва бошқалар. Ривожланган демократик давлатлар, жумладан Сингапур, Швеция, Финландия давлат ислоҳотларини айнан мазкур иллат – коррупцияни илдизига болта уриш билан бошлаганлиги ва бу борада тизимли равишда иш олиб боришни ўзларининг асосий вазифалари деб белгилаган. Мамлакатимизнинг келажагини ва обрў-эътиборини қадрлайдиган ҳар бир виждонли фуқаро коррупция таҳдидини зарарли оқибатларини доимо эсда тутмоғи ва унга қарши курашмоғи шарт. Шу муносабат билан, Жамиятда коррупцияга оид ҳуқуқбузарликларни энг аввало олдини олишга қаратилган асосий талаблар ва тамойилларни белгилаш, жамиятда коррупцияга қарши курашиш маданияти даражасини ошириш учун, шунингдек Жамият ходимлари томонидан ўз фаолиятида коррупцияга оид ҳуқуқбузарликлар содир этилишига йўл қўймаслик ва бу борада самарали тизимни шакллантириш мақсадида “Ўзбекэкспертиза” АЖнинг коррупцияга қарши курашиш Сиёсати, Низом ва бошқа тегишли ички меъёрий ҳужжатлари қабул қилинди. Хулоса ўрнида шуни айтиш керакки, коррупция ва порахўрлик жамият барқарорлигининг муҳим асоси бўлган адолатнинг йўқолишига олиб келади. Мамлакатимиз мустаҳкамлиги, халқимиз фаровонлиги, юртнинг ривожи ва гуллаб яшнашини, обод бўлишини истаган ҳар бир фуқаро пора олиш ва бериш иллатидан халос бўлиши керакдир.