“O'zbekekspertiza” AJ Bosh direktorining korrupsiyaga qarshi kurashish faoliyatini samarali tashkil etish yuzasidan Jamiyat hodimlariga MUROJAATI

 

Hozirgi globallashuv, mintaqa va davlatlararo integratsiya jarayonlari jadallashib borayotgan murakkab bir sharoitda korrupsiya chegara bilmas muammoga aylandi.
Aytish lozimki, korrupsiya keltirib chiqarayotgan oqibatlar jamiyatlarni ich-ichidan yemirib, demokratik va huquq ustuvorligi asoslariga putur yetkazadi, inson huquqlarining qo’pol ravishda buzilishiga olib keladi, iqtisodiy rivojlanishni izdan chiqaradi, jamiyat va davlat uchun o’ta xavfli bo’lgan uyushgan jinoyatchilik va terrorizmning keng yoyilishiga sharoit yaratib beradi.
Mamlakatimizda korrupsiyaga qarshi kurashish sohasida qonun hujjatlarini yanada takomillashtirish, fuqarolarning huquqiy madaniyatini yuksaltirish, jamiyatda korrupsiyaga nisbatan murosasiz munosabatni shakllantirish borasida keng ko’lamli ishlar amalga oshirilmoqda. Ta’lim, sog’liqni saqlash, ijtimoiy ta’minot, davlat va jamiyat hayotining boshqa sohalarida ushbu jinoyatga oid huquqbuzarliklarni o’z vaqtida aniqlash, chek qo’yish, bunga imkon beruvchi sabab va omillarni bartaraf etish masalalari doimiy e’tiborda.
Xususan, «korrupsiyaga qarshi kurashish to’g’risida»gi qonunning qabul qilinishi, shuningdek, korrupsiyaga qarshi kurashish bo’yicha respublika idoralararo komissiyasining tashkil etilishi va korrupsiyaga qarshi kurashish bo’yicha Davlat dasturining tasdiqlanishi yurtimizda korrupsiya bilan bog’liq huquqbuzarliklarning oldini olishga qaratilgan qator chora-tadbirlarni samarali amalga oshirilishini ta’minlayotir.
Qisqa vaqt ichida korrupsiyaga qarshi kurashishning huquqiy mexanizmlarini takomillashtirishga oid bir nechta O’zbekiston Respublikasi Prezidentining tegishli farmon va qarorlari qabul qilindi. Shu jumladan, 03.02.2021 yildagi PF-6155-son, 06.07.2021 yildagi PF-6257-son, 06.07.2021 yildagi PQ-5177-son, 22.10.2021 yildagi PQ-5263-son, 07.12.2021 yildagi PQ-34-son, 12.01.2022 yildagi PQ-81-son va boshqalar.
Rivojlangan demokratik davlatlar, jumladan Singapur, Shvetsiya, Finlandiya davlat islohotlarini aynan mazkur illat – korrupsiyani ildiziga bolta urish bilan boshlaganligi va bu borada tizimli ravishda ish olib borishni o’zlarining asosiy vazifalari deb belgilagan.
Mamlakatimizning kelajagini va obro’-e’tiborini qadrlaydigan har bir vijdonli fuqaro korrupsiya tahdidini zararli oqibatlarini doimo esda tutmog’i va unga qarshi kurashmog’i shart.
Shu munosabat bilan, jamiyatda korrupsiyaga oid huquqbuzarliklarni eng avvalo oldini olishga qaratilgan asosiy talablar va tamoyillarni belgilash, jamiyatda korrupsiyaga qarshi kurashish madaniyati darajasini oshirish uchun, shuningdek jamiyat xodimlari tomonidan o’z faoliyatida korrupsiyaga oid huquqbuzarliklar sodir etilishiga yo’l qo’ymaslik va bu borada samarali tizimni shakllantirish maqsadida «O’zbekekspertiza» AJ ning korrupsiyaga qarshi kurashish siyosati, Nizom va boshqa tegishli ichki me’yoriy hujjatlari qabul qilindi.
Xulosa o’rnida shuni aytish kerakki, korrupsiya va poraxo’rlik jamiyat barqarorligining muhim asosi bo’lgan adolatning yo’qolishiga olib keladi. Mamlakatimiz mustahkamligi, xalqimiz farovonligi, yurtning rivoji va gullab yashnashini, obod bo’lishini istagan har bir fuqaro pora olish va berish illatidan xalos bo’lishi kerakdir.