O’zbekiston Respublikasi Davlat gerbi qabul qilinganining 30 yilligi munosabati bilan «O’zbekekspertiza» AJ xodimlari o’rtasida davlat ramzlariga hurmat ruhini shakllantirish, vatanparvarlikni ulug’lashga bag’ishlangan tematik madaniy-ma’rifiy tadbir tashkillashtirilib, «eng yaxshi she’r», «eng yaxshi hikoya» va «eng yaxshi maqola» tanlovlari o’tkazilmoqda.

Gerbim — bag’rikenglik timsoli

1992 yil 2 iyul.

Har bir insonni ta’riflaganda uning o’ziga xos sifatlari alohida keltirib o’tiladi. Tashqi ko’rinishi, fe’l-atvoridagi biz bilgan jihatlar haqida so’zlaymiz. Bir millat haqida so’z ketganda-chi? Albatta madaniyati, aholisining yashash tarzi xususida bilganlarimizni nutq etamiz. Yana bir shunday timsol borki u o’sha mamlakatning yuzi, orzu umidlarini aks ettiradi. Bu – davlat ramzlaridir.

Yer yuzida ikki yuzdan ortiq davlat bor va albatta, har biri o’z ramzlari – milliy timsollariga ega. Davlat bayrog’i, gerbi va madhiyasi shular jumlasidandir. Har birida o’ziga xos uslub, ayricha mazmun va rang jilolanadi. Davlat ramzlari xalqning mustaqilligi, ozodligi, tinchligi va barqarorligi timsoli hisoblanadi. Quvonarlisi, ular bilan yonma-yon turadigan O’zbekiston Respublikasi davlat ramzlari hech kimdan kam emasligimiz va kam bo’lmasligimizni ko’rsatib turadi. Ularda xalqimizning asriy orzu umidlari, milliy qadriyatlari mujassam.

Ana shunday orzu umidlar aks ettirilgan Davlat gerbi O’zbekiston Respublikasining 1992 yil 2 iyuldagi «O’zbekiston Respublikasi Davlat gerbi to’g’risida»gi Qonuni bilan tasdiqlangan. Mana 30 yildirki har bir o’zbek farzandining ko’nglidagi ulug’iftixor sifatida qadrlanib kelmoqda.

Yurtimning go’zal jamolini o’zida aks ettirgan gerbimda tog’lar, daryolar, mo’l hosil ramzi bo’lgan bug’doy boshoqlari, chanoqlari ochilgan g’o’za shoxlaridan iborat chambarga o’ralgan gullagan vodiy uzra quyosh zarrin nurlarini sochib turadi. Yuqori qismida Respublika hurligining ramzi sifatida sakkizburchak tasvirlangan bo’lib, uning ichki qismida yarim oy va yulduz tasvirlangan. Gerbning markazida himmat, olijanoblik va fidoyilik timsoli bo’lgan afsonaviy Humo qushi qanotlarini yozib turibdi. Ushbu ramz va timsollar xalqimizning tinchlik, yaxshilik, baxt-saodat, farovonlik yo’lidagi orzu-umidlarini ifodalaydi. Gerbning pastki qismida O’zbekiston Respublikasi Davlat bayrog’ini ifoda etuvchi chambar lentasining bantida «O’zbekiston» deb yozib qo’yilgan.

O’zbekiston Respublikasi Davlat gerbining rangli ko’rinishida:

Humo qushi va daryolar — kumush rangida;

quyosh, boshoqlar, paxta chanoqlari va «O’zbekiston» yozuvi — oltin rangida;

g’o’za shoxlari va barglari, tog’lar va vodiy — yashil rangda;

chanoqlardagi paxta — oq rangda;

lenta — O’zbekiston Respublikasi Davlat bayrog’ining ranglarini aks ettiruvchi uch xil rangda;

sakkizburchak — oltin zarhal bilan hoshiyalangan holda havo rangda;

yarim oy va yulduzlar — oq rangida tasvirlangan.

Bu tasvirlar xalqimizning asrlar davomida orzu qilgan g’ururi, sha’ni, qadr-qimmati, irodasini ifodalovchi sifatida namoyon bo’lgan. Ajdodlarimizning orzu-armoni, xalqimizning buguni, o’lmas xotirasi, iymon-e’tiqodi, kelajakka bo’lgan komil ishonchi jilolanadi.